শিল্পী : শৰৎ

শিল্পী : শৰৎ
নীলা আকাশত
কপাহ কোমল
শুকুলা ডাৱৰেৰে
পলকতে মনোমোহা চিত্ৰ আঁকে কোনে
জানানে ?

দূৰৈৰ পাথাৰত
কঁহুৱা বনত
শুকুলা ৰং
সানে কোনে জানানে ?

জানানে
শ্যামলী পথাৰত
কাৰ নিৰ্দেশনাত
শুকুলা কঁহুৱাবোৰে
লয়লাসে নাচে
বতাহৰ ছন্দে ছন্দে ?

জানানে
কাৰ অমৃত পৰশত
হাঁহে শেৱালিপাহে
কোনে মিঠা সুবাস সানে
শেৱালিৰ কোমল শুভ্ৰ পাপৰিত ?

কোনে আঁকে চোতালত
দূৱৰিৰ সেউজীয়া সুকোমল দলিচা ?

পুঁৱতি নিশা
কোনে পিন্ধাই আজলী দূৱৰিক
নিয়ৰৰ শুকুলা মুকুতা ?

জানানে ?
জোনাক সনা আকাশত
তৰাৰ বাখৰ খটাই
কোনে বাৰু বুটা বাছে নিজান নিশা ?

শৰতে…
শৰতে...
শৰতেই চতিয়াই
নৃত্যৰতা প্ৰকৃতিৰ বুকুত পূৰ্ণতাৰ ৰং ।
শৰতেই আঁকে
প্ৰকৃতিৰ চকুত সপোনৰ সোণোৱালী ৰং ।
শৰৎ যে
প্ৰেমিক শিল্পী প্ৰকৃতিৰ ।

ණসাৰদা শ্ৰেষ্ঠ